Desde a Coordinadora Comarcal do PSdeG-PSOE de Valdeorras súmanse ás manifestacións de apoio e “solidariedade coas traballadoras e traballadores da empresa Irosa-Samaca ante a situación de peche e paralización da empresa causada por unha resolución xudicial”.
Aseguran respectar “as decisións xudiciais”, pero consideran que “unha cuestión que ten que ver cun litixio relativo á propiedade privada dos terreos, non pode privar aos traballadores dun dereito fundamental, recollido na Constitución Española, como é o dereito ao traballo”.
Dende a Coordinadora socialista manteñen que independentemente do proceso xudicial en marcha, “ten que haber mecanismos para que a actividade laboral non se paralice e que os empregados e empregadas poidan seguir exercendo a súa actividade laboral”.
No comunicado que veñen de emitir aseguran que “os empregados e empregadas non son os responsables da situación xerada” e que cada día de peche “supón un incumprimento das obrigas empresariais como o pago a provedores, entrega de pedidos aos clientes, cumprimento das obrigas tributarias e, sobre todo, o pago de nóminas do persoal”, algo que a todas luces “pon en grave perigo a continuidade dos case 300 postos de traballo directos e outros tantos indirectos, así como a subsistencia das familias, que deberían ser a prioridade neste conflito”.
“Apoio institucional da Deputación de Ourense para os traballadores de Irosa-Samaca”
No marco da reunión da Comisión de Administración, Transparencia e Emerxencia da Deputación de Ourense celebrada hoxe, Aurentino Alonso Araujo, deputado do PSdeG-PSOE pola comarca de Valdeorras, instou á adopción dunha declaración institucional de apoio aos case que 300 traballadores da pizarreira tralo peche xudicial da empresa. “Debemos manifestar a nosa solidariedade coas traballadoras e traballadores da empresa Irosa-Samaca perante a situación de peche e paralización da actividade precipitada por unha resolución xudicial”, destacou Alonso.
