Ponte moi intensa para as Macizas Centrais de Trives. Tras participar o 7 de decembro na primeira edición dos Cantos de Taberna de Maceda, este grupo trivés desprazábase o 8 de decembro ata a localidade lucense da Pobra de Brollón nunha nova saída musical. Acudían aos Cantos de Taberna desta vila, organizados polo Concello, que chegaban xa a súa oitava edición.
As actuacións comezaban as catro e media da tarde na Casa da Cultura e logo proseguían polos bares, nun circuíto no que cada grupo tiña que visitar media ducia de establecementos. Desta volta tocaban unhas trece formacións. Así, ademais das Macizas Centrais, participaban Os corenta e chinco boys, Searas, Con Ton e Son, As Recuncadas, Os Somontanos, Os Estoupafoles, Son do Maio, Sómosche d’Herbas, Cantareiros da Unión, De Marcón pra Riba, Skachacunchas, Os Amigos do Caldeiro e Os Parrandas.
Ás 23h. remataba o percorrido polos bares e todos os grupos reencontrábanse na Casa da Cultura, onde recibían un diploma, un agasallo de recordo, un xamón e un lote de viño.
Fotos: As Macizas Centrais.