A fortuna non acompañaba ao piloto valdeorrés Leo Pérez Pereira nesta fin de semana no circuíto de Zuera (Zaragoza), no que se disputaba a primeira das probas do IAME Euroseries 2022 de karting, onde competía na categoría Mini.
Tras a súa destacada 11ª posición na xeral do venres, o sábado lograba superar as complicacións no motor nas dúas primeiras carreiras, quedando sétimo na terceira, pero na semifinal da mañá deste domingo o toque doutro kart, nun adiantamento, sacábao da pista. Malia que volveu entrar, non logrou recuperar a posición e rematou no posto 19 da semifinal.
A pesar diso, tanto o piloto o como seu pai, Julio Pérez, fan un balance moi positivo da súa primeira experirencia nun europeo de karting. “Estamos moi contentos porque Leo correo cos mellores pilotos de Europa e chegou á semifinal do domingo”. Agora Leo Pérez, que compite con DG Motorsport e leva chasis de Alonso Kart, pensa xa no Campionato de España, cuxa primeira proba terá lugar en abril.
Fotos cedidas.
