Andainas-Trails-OrientaciónDeportesÚltima hora

Os deportistas valdeorreses tamén apostan polo Camiño de Inverno

Un grupo de 20 peregrinos xa completaron dúas etapas da ruta que pasan pola comarca

 

Un grupo de deportistas do Barco de Valdeorras, están percorrendo as etapas do Camiño de Inverno que transcorren por terras valdeorresas. Comezaban o 24 de outubro cos 21 quilómetros entre Puente de Domingo Flórez e O Barco, e na xornada deste 14 de novembro facían a etaba O Barco-Albaredos. “Son catro horas de camiñata pola mañá, cada tres domingos”, puntualiza o promotor da iniciativa, André Faria, licenciado en Ciencias do Deporte e xerente de AF Training.

 

Os peregrinos diante da igrexa da Proba.

 

El mesmo explica que a idea nacía co obxectivo de darlle aos seus deportistas todas as ferramentas necesarias para iniciar o Camino. De feito, nun principio o proxecto contemplaba tres etapas que discorren pola comarca de Valdeorras “para que despois os propios deportistas terminen a ruta xa de cara á primavera e pola súa conta “, adianta André, asegurando que o seu obxectivo é “fomentar a actividade física e o ocio activo entre os clientes de AF Training, ademais de dar difusión ao Camiño Xacobeo de Inverno, que xa está sinalizado integramente”.

 

En plena ruta.

 

Así, cunhas condicións inmellorables e descubrindo grandes paraxes da comarca que moitos descoñecían, o grupo barquense botábase a andar percorrendo fermosos pobos como Pumares, Éntoma ou mesmo Albaredos no que finalizaba a etapa de hoxe co recibimento por parte da adega de Albaredos Hobbs, que lle dan un valor engadido a esta ruta.

Tralo éxito das dúas primeiras etapas con 20 peregrinos valdeorreses, AF Training contempla unha modificación no obxectivo inicial e facer que todos os seus deportistas “cheguen a Compostela na vindeira primavera de 2022”, adianta André.

 

Diante da igrexa de Fontei, na Rúa.

 

Fotos cedidas.

Artigos relacionados

Back to top button