Nova semana de actividades en defensa do Medio Ambiente para os Ecovixiantes de Franciscanas de Ourense.
Non só se trata de recoller cabichas; tamén hai que levar o obxecto en que depositalas. Por iso os luns realizan un taller de reciclaxe, onde se aproveitan as botellas plásticas que o alumnado utiliza en Franciscanas, máis un estuchado especial, para personalizar o cabichómetr que teñen o seu uso nas saídas ambientais dos mércores para retirar as perigosas cabichas da contorna. “En condicións normais, unha cabicha tardaría uns doce anos en desaparecer, e contaminaría uns 50 litros de auga”, lembran os Ecovixiantes.
Un pouco de taponeo solidario e un libro dos Bolechas para concienciar, completaron a ocupación do tempo libre do luns para os Ecovixiantes.
E xa o mércores celebraban o Día Mundial do Coidado da Natureza cunha limpeza na Praza-Pista Vermella da rúa Barros Sibelo de Ourense. “Como tantos outros lugares que percorremos e nos que actuamos, cremos que están descoidadas: maleza, bastante lixo en forma de botellas de plástico e latas de aluminio, papeleiras metálicas rotas e fóra dos seus emprazamentos…”, lamentan os Ecovixiantes, alertando de que o propio piso da pista deportiva non ofrece demasiada seguridade nestes días chuvioso. “As canastras de baloncesto tamén necesitan algún axuste e por suposto as sempre presentes cabichas, todo un clásico das nosas saídas”.
Con estas actividades Ecovixiantes quere demostrar que “son os pequenos xestos os que en realidade cambian o mundo, humanizándoo e transformándoo nun lugar máis agradable. Reducir, reutilizar e reciclar seguen sendo piares básicos neste lenta pero segura transformación. Coidar a Natureza, a contorna, compétenos a todas e a todos”, aseguran.
Fotos cedidas.