Guiados por profesionais sanitarios, un grupo duns 26 alumnos do CEIP Condesa de Fenosa do Barco, coas súas profesoras, coñecía no mediodía deste 8 de xuño diversas consultas do Centro de Saúde desta vila e tamén o labor que se desenvolve nestas instalacións. Esta é a segunda visita deste tipo que se realiza nunha semana, organizada polo persoal deste Centro no Barco no marco do programa “Coñece o teu Centro de Saúde”.
Trátase dunha “iniciativa de saúde comunitaria que comezou en Bande, coa visita do CEIP Xoaquín Lorenzo, e a semana pasada no Barco de Valdeorras, coa visita do CEIP Julio Gurriarán. Esta a ser moi ben recibida e este ano realizarase en distintos centros de saúde cos colexios da súa área de referencia”, explican dende o Sergas.
No decurso da visita estes nenos e nenas (duns 3-4 anos) podían coñecer mellor ao persoal médico e de enfermería, pero tamén ao de traballo social, farmacia, odontoloxía, pediatría, limpeza ou de servizos xerais, ademais da ambulancia, o ecógrafo… Ao mesmo tempo familizarízanse coas aparataxes e material sanitario.
Esta actividade tamén busca que os máis pequenos vaian perdendo os medos e se acheguen á Atención Primaria, coñecendo as funcións de cada un dos seus profesionais.
Fotos: A.R.