De celebración están os veciños da parroquia de Alais en Castro Caldelas. Veñen de honrar ao seu patrón San Bartolomé e de novo puxeron na man do santo as primeiras uvas maduras de mencía e godello desta colleita, recollidas na Costa de Alais e Porto de Lobos, da D.O. Ribeira Sacra.
Pese á pandemia e a ser día laborable, os veciños quixeron compartir este día xuntos. “O Concello e os veciños participaron nunha alborada acompañados da música por toda a Parroquia onde ían sendo recibidos cos bos produtos da terra. E por suposto non faltou o viño da Ribeira Sacra da subzona de Castro Caldelas, a bica manteigada, o roscón caseiro e un bo licor café e licor de herbas”, explica a alcaldesa de Castro Caldelas, Sara Inés Vega.
Ademais nesta xornada tan especial honrouse tamén á veciña máis maior, a señora Carmen que aos seus 93 anos segue conservando o humor e a retranca. Tamén se recordou cunha peza musical a José, O Roxo, ante a súa tumba porque durante a súa vida sempre foi un dos colaboradores na organización destes festexos.
Foi unha xornada emotiva e de ledicia entre os veciños e na que se lle pediu ao Santo o cese desta pandemia para poder recuperar a convivencia en normalidade.
Fotos cedidas.