Viños de ata 19 adegas da Denominación de Orixe Valdeorras, case a metade das existentes no territorio amparado, poden degustarse ao longo desta xornada de 7 de novembro no showroom con bodegueiros que se desenvolve no Hotel Finisterre da Coruña. “Esta cidade sempre foi e será un mercado prioritario para os nosos viños e hoxe, de novo, traemos un pequeno anaco do noso territorio amparado ata esta cidade co obxectivo de dar a coñecer os mellores brancos e tintos que producimos en Valdeorras e que están a conquistar todo tipo de padais, asegura o presidente do Consello Regulador D.O. Valdeorras, José Ramón Rodríguez.
Este evento promocional consta de diversas actividades orientadas tanto a prescritores e públicos especializados como a outros de corte máis xeralista. “O obxectivo último é dar a coñecer o noso potencial vitivinícola ao maior número de persoas posible para que saiban que somos o berce do godello, pero que tamén somos quen de elaborar tintos dunha excelente calidade”, continúa Rodríguez Castellanos.
A axenda de actos desenvolvida no marco deste showroom iniciábase onte cunha cata, promovida polo equipo do prestixioso sumiller Luis L. Paadín (Paadín Eventos), e dirixida polo director técnico do Consello Regulador, Jorge Mazaira, que se orientou a un público profesional. Sumilleres, adegueiros, distribuidores, consumidores especializados, xornalistas e bloggers foron algúns dos perfís que conformaron o grupo de case 30 persoas que participou nesta cata comentada, na que se divulgaron datos técnicos e curiosidades sobre o xeito de elaborar viños nun territorio amparado, o de Valdeorras, que se caracteriza por contar cunha gran variedade de solos para o cultivo da uva.
Ao longo da xornada de hoxe, entre as 11h. e as 14h. desta mañá, e de 17h. a 21h. da tarde, os adegueiros desprazados ata a cidade herculina ofrecen unha degustación do mellor das súas colleitas nun acto aberto a todo tipo de público, que está xerando unha gran expectación e afluencia de visitantes.
Entre as persoas que xa pasaron por este showroom figura a subdelegada do Goberno na Coruña, María Rivas, que puido coñecer, de primeira man, o bo facer vitivinícola de Valdeorras, unha visita que o presidente do Consello Regulador quixo agradecer “moi especialmente”.
Xunto a isto, no marco do programa que se está a desenvolver no Hotel Finisterre un grupo de alumnos do Ciclo Superior de Dirección de Servizos de Hostalaría do CIFP Paseo das Pontes da Coruña recibía unha charla introdutoria sobre Valdeorras e os seus viños por parte do director técnico do Consello Regulador.
