O SICTED (Sistema Integral de Calidade Turística En Destino) acaba de outorgar a distinción de calidade a catro novos establecementos privados de Parada de Sil, tal e como se vén de informar dende este Concello.
“Cómpre salientar que o Concello ten tres distintivos outorgados por este organismo da Secretaría de Estado de Turismo do Goberno de España, concedido e que volve a renovar na oficina de turismo, na casa Museo do Chocolate e no Mosteiro de Santa Cristina, o buque insignia do turismo no concello”, tal e como explican dende o grupo de goberno local.
Dende o Concello apóstase por promover as sinerxías coas empresas privadas “para acadar un mellor servizo aos visitantes”. Nese senso dende o concello editouse e distribuíuse unha Guía de Boas prácticas que procura axudar a conseguir o obxectivo.
O distintivo outorgado recoñece o esforzo e compromiso de empresas e institucións coa mellora continua da calidade e satisfacción dos visitantes. A nivel privado este ano a distinción outorgouse ao Balcón da Ribeira, Carriozas Aloxamento Turístico, a Reitoral da Chandrexa, establecemento de agroturismo, e á Reitoral de Parada de Sil, un edificio do século XVII rehabilitado con pleno respecto a historia do edificio.
“É unha verdadeira satisfacción e orgullo que o concello de Parada de Sil teña oito distintivos do SICTED e tres en institucións públicas e seguramente se irán incrementando”, asegura o seu alcalde, Aguilino Domínguez
