O vindeiro 24 de outubro conmemórase o Día das Bibliotecas e na municipal da Rúa adiantan a celebración para o venres 21. Ese día ás sete da tarde acollerá o espectáculo ‘Petiscos de lingua’ de Migallas Teatro, dentro do programa FalaRedes, da Rede de Dinamización Lingüística.
A representación, indicada para público infantil e familiar, ten como finalidade dar a coñecer e fomentar a práctica de ditos e recitados da literatura popular infantil de Galicia. Con xogos verbais, cancións, contos e monicreques ofrécese dun xeito divertido esa escolma de ditos tradicionais.
