Dende a mañá deste luns 24 de xuño e ata o 31 de xullo desenvolverase nas instalacións do Colexio Divina Pastora do Barco de Valdeorras o campamento estival “Un verán en acción” que conta con 55 cativos de entre os 3 e os 12 anos.
Do traballo e esforzo do equipo directivo do colexio Divina Pastora e a empresa de Lecer e Deporte Escolar AF Movement nace esta iniciativa, co obxectivo de “fomentar o xogo e as actividades deportivas escapando do sedentarismo, fomentando que todas as nosas actividades sexan unha ferramenta lúdico-didáctica e deportiva” pero tamán como unha alternativa ao tradicional campamento municipal, tal como explica o responsable da empresa, André Faria.
El mesmo destaca que o campamento está centrado no apartado deportivo, dividindo o pavillón en tres espazos: un para o deporte de implemento, outro de psicomotricidade e outro para deportes de equipo con pelota, rotando aos cativos polas diferentes actividades, pero tamén teñen talleres de manualidades “sobre todo para os máis pequenos”. Ademais farán saídas ao Chao con xogos de auga e xincanas, visitas ao Concello, Biblioteca e demais “para crear un ambiente de verán, distendido e entretido”.
O horario é de 10 a 13 horas con servizo de conciliación para as familias tanto ás 9 como de 13 a 14 horas. Comeza así o primeiro campamento do verán xa que os demais non o fan ata o mes de xullo.
Fotos Mónica G. Bellver.
