Na xornada deste mércores 18 de xaneiro presentábase na 43ª edición da Feira Internacional de Turismo, FITUR, en Madrid, o Plan de Sustentabilidade Turística en Valdeorras que potenciará o enoturismo e o patrimonio natural e cultural da zona.
O Plan “Valdeorras, roteiro do viño milenaria” supoñerá un investimento de 1,5 millóns de euros co que se pretende “mellorar a xestión de uso público de diferentes puntos de interese que permitirán un aproveitamento turístico sostible e a posta en valor do patrimonio natural e cultural da comarca”. Foi promovido polos concellos da comarca a través de su GDR7 Valdeorras, presidido por la alcaldesa de Carballeda de Valdeorras, Mari Carmen González e permitirá intervir, entre outros puntos, nas Covas de Valdeorras, o desenvolvemento de produto asociados ao Destino Starlight Trevinca e impulsar a mobilidade peonil entre municipios da comarca. No marco do mesmo, prevese levar a cabo 17 actuacións enmarcadas en catro eixos (transición verde e sostible, mellora da eficiencia enerxética, transición dixital e competitividade) que serán executadas no período 2023-2025.
A presentación dos obxectivos do Plan en Fitur 2023 correu a cargo da xerente do Inorde, Emma González e da directora da Axencia de Turismo de Galicia, Nava Castro. Na súa intervención, a xerente do Inorde lembrou que os obxectivos que persegue este Plan encaixan á perfección coa visión integral que ten a administración provincial de “un impulso turístico baseado na sustentabilidade e no respecto pola autenticidade do noso, tal e como se reflicte na nosa marca turística “Ourense Xenuína”. O ámbito territorial do xeodestino Trevinca-Valdeorras coincide co do GDR7, sendo integrados polos municipios da Veiga, Larouco, O Barco de Valdeorras, O Bolo, Petín, Rubiá, Vilamartín de Valdeorras, A Rúa e Carballeda de Valdeorras.
Ao acto asistían entre outros os alcaldes do Barco e Larouco, Alfredo García e Patricia Lamela; o presidente da Asociación Ruta do Viño de Valdeorras, Joaquín Sánchez; e o delegado da Xunta en Ourense, Gabriel Alén. A presentación finalizou coa proxección do vídeo do xeodestino “Terras que Saben”, a mensaxe publicitaria que lidera a promoción desta zona oriental da provincia de Ourense e que se estreou, precisamente, o ano pasado en Fitur. O vídeo, co que se pretende “gañar notoriedade deste territorio singular”, sintetiza os principais recursos patrimoniais, naturais, enogastronómicos e experienciales que ofrecen os nove municipios que integran o xeodestino.