Hoxe si. Logo de moito pelexar e tamén sufrir, as rapazas do Rúa Valdeorras Futsal lograban por fin a ansiada vitoria na casa, diante da súa afección.
Na tarde deste sábado 11 de novembro o conxunto valdeorrés de fútbol sala feminino que compite na Preferente Galicia, repetía partido en casa, no pavillón municipal da Rúa, ante o Moaña, e desta volta non só vencía senón que o facía por goleada, 12-6.
Cunha clara declaración de intencións eran as locais as que se adiantaban no marcador nada máis comezar o partido e aínda que as pontevedresas ían á zaga as de Rosendo Durán lograban manter a vantaxe e a superioridade sumando así a segunda vitoria da tempada (a primeira foi no pavillón do Composala). Os goles locais foron seis de Carlota, catro de Carolina e dous de Marta.
A seguinte cita será no pavillón da Gándara, en Ferrol, contra A Fervenza FSF Narón.
Fotos e vídeo: Mónica G. Bellver.