UNED Sénior de Ourense bate este ano o seu récord de persoas interesadas ao alcanzar as 115. “É a cifra máis alta nos dez anos que leva prestando servizo na cidade”, din dende o centro, destacando que para o curso 2024-2025 as prazas esgotáronse con celeridade.
“Esas persoas que apostaron por facer os cursos de UNED Sénior en Ourense deron lugar a 230 matrículas en diversas materias”, aseguran, destacando a modo de anécdota que “as materias relacionadas coa arte cubríronse nunha hora”, repuntando o interese por pertencer a esta sección de estudantes veteranos. UNED Sénior Ourense permite aos maiores de 55 anos, cursar unhas materias que eles elixen por votación dunha oferta que lles fai a Universidade. Non son ensinos regrados, isto é, non hai exames nin título oficial.
Cada participante goza aprendendo conceptos daquelas materias que son do seu interese. UNED Senior Ourense favorece o contacto entre as persoas xubiladas ou a piques de selo, establecendo entre elas lazos de amizade, compañeirismo, e desenvolver inquietudes para estar activos e seguir gozando daquilo que nos seus anos laborais non puideron dedicarlle tempo. Non hai límite de idade nesta sección. _Os estudantes ao longo do curso participan en diversas saídas culturais, ben sexa para ver patrimonio histórico ou para accións relacionadas coa natureza e o medio ambiente.
“Esta cifra de matrículas reflicte a seriedade e o nivel das materias que se imparten grazas ao bo facer do cadro de persoal do profesores titores con que conta UNED Sénior Ourense”, sinala o director, Jesús Manuel García. “E xunto a eses docentes, hai que destacar igualmente o bo traballo desenvolvido polo persoal do Centro Asociado ourensán e a coordinación, que leva a cabo con verdadeiro esmero a profesora María Concepción Álvarez López,” engade o director.
UNED Sénior é un programa formativo dirixido a esas persoas maiores de 55 anos que buscan completar a súa experiencia profesional e coñecementos previos, sexan cales sexan, cunha formación que lles permita actualizarse e adquirir unha maior comprensión e participación na sociedade actual.
