O Concello de Barbadás celebrou onte a sesión plenaria ordinaria correspondente ao mes de xullo cun debate que se atascou especialmente nunha das mocións que presentaba o Partido Popular sobre os desbroces no campo de fútbol de Bentraces. Tamén a reforma das piscinas municipais acaparou a atención dos partidos que conforman o hemiciclo, coas queixas veciñais como punto de partida.
A sesión daba comezo ás 19:30 horas cunha orde do día que contiña dúas mocións do PP e unha de Democracia Ourensana (DO). Así, tras a aprobación da acta anterior, o debate centrouse primeiramente na ordenanza municipal do servizo de autotaxi do Concello, que foi aprobada cos votos do PSOE, BNG, DO e Compromiso por Barbadás. Os populares abstivéronse.
Logo debateuse a moción de DO, na que plantexaba queixas dos veciños no marco das pasadas festas patronais da Valenzá. O grupo pediu ao goberno local que se reduzan os horarios das verbenas para facilitar o descanso dos cidadáns e a limpeza inmediata das rúas, así como a instalación de urinarios públicos. Foi aprobada por unanimidade.
En canto ás mocións do PP, a primeira tamén foi apoiada por todos os grupos políticos. Deste xeito, o Concello deu luz verde para adherirse ao programa de cooperación da Deputación para instalar desfibriladores.
No entanto, o debate complicouse coa segunda das mocións, na que os populares pedían ao goberno local o acondicionamento do campo de fútbol de Bentraces. Queixáronse do “abandono” das instalacións e pedían máis desbroces na zona. Neste punto, o equipo de goberno insistiu en que a limpeza na contorna se fixera varias veces e asegurou que no campo non se poden acometer actuacións deste tipo: “é propiedade privada”, explicou o tenente alcalde, o nacionalista Xosé Manuel Fírvida.
Por último, as piscinas municipais acapararon o último debate dun pleno que se alongou até as 22 horas. O edil de Compromiso por Barbadás planeou levalas pola vía de urxencia para reclamar ao goberno local o arranxo dos desperfectos que di que volven rexistrar as instalacións tras a recente reforma acometida. Pola súa banda, o goberno replicou que a empresa responsable da obra recoñece a situación e asume a responsabilidade, polo que están pendentes de volver a actuar. Mais ao estar en plena tempada estival, explicaron que agardarán para non pechar as instalacións e evitar así deixar sen servizo aos veciños. Foi aprobada por unanimidade.
