Tralo aprazamento dos campionatos autonómicos debido ás restricións das últimas semanas, na xornada deste sábado 6 de marzo regresaba a competición á Piscina Rosario Dueñas (Ourense), cunha dobre cita oficial: a liga galega de natación e a Copa Deputación 2021.
Ao longo da mañá celebráronse as ligas de idades das categorías promesas, benxamín e alevín que completaron a terceira xornada na que os membros do Club Natación Pabellón Ourense ocupan postos altos na táboa galega. Ademais, a nivel individual “os pabellonistas engrosaron en moitos casos a súa conta particular de marcas mínimas para cando se poida celebrar o campionato galego, que previsiblemente será o vindeiro mes de xullo”, adiantan dende o CNPO cuxos adestradores están satisfeitos, máis aló das marcas, probas e obxectivos, co regreso á rutina de adestramentos e competición onde os nenos e nenas “mostraron un bo nivel, reflectíndose o bo facer destas semanas nas que adestraron nos seus fogares, fóra do seu medio e mediante videochamadas”.
Pola tarde, celebrábase a primeira xornada de Copa Deputación que rematá antes do mes de xuño. Malia que o aforo de participantes era reducido, os mozos e mozas do CNPO tiñan ganas de probarse con diferentes obxectivos. “Uns que estiveron na casa adestrando o xusto para manter a forma para volver á auga, outros como membros da sección de tríatlon do club onde teñen as miras postas no campiontato de España de equipos e outros miraban de esguello o nacional infantil que se celebraba simultaneamente en Málaga ou os que terán lugar en varias semanas”, explican dende o club ourensán.
Nesta competición o resultado máis destacable foi a dobre vitoria de Iván Vázquez nas probas de velocidade de crol. “Clara dominadora tamén foi na braza feminina Alba de la Fuente con triunfo no hectómetro e nos 200 metros onde ademais batía o récord provincial de 15 anos vixente desde o ano 2008”, explican dende o club, engadindo que ambos nadadores infantís non puideron estar esta fin de semana no nacional onde debido ás restricións do Covid-19, só accedían os 12 mellores cronos de tobo o ámbito nacional, “pero cos rexistros realizados esta fin de semana xa se sitúan entre os mellores para verán”, aseguran.
Por outra banda, David González e Eva Feijoo probaron o seu nivel de cara ao nacional do vindeiro mes, de onde sairá a lista para os Xogos Olímpicos e na que estarán “se acceden por clasificación reducida a dez por proba”.