Sábado 17 de outubro. 11 horas na porta do Pazo Museo Otero Pedrayo (Trasalba). Ese é o punto de partida do roteiro literario polas terras de Trasalba, organizado pola Fundación Otero Pedrayo.
Da man de Susi González Rodríguez, guía do Pazo Museo, o percorrido levará aos participantes poloPazo do Campo, a Igrexa de San Pedro de Trasalba, A Fonteliña, A Bergueira, O Quintairo, o Muíño do Ruzo, a vella tenda de Trasalba, oPenedo Redondo, e un souto, onde se realizarán lecturas comentadas de fragmentos da obra do Otero Pedrayo. Ao rematar, visitarase o Pazo Museo en Cima de Vila, “onde o patriarca das letras galegas pasou longas temporadas desde a súa infancia até o seu pasamento en 1976”, tal como explican dende a Fundación.
Trátase dunha xornada de convivencia para dar a coñecer a vida e a obra do escritor ourensán, fondamente relacionadas con Trasalba, polo que os veciños da localidade terán a oportunidade de compartir cos asistentes os seus recordos sobre os lugares que se visiten, sempre vencellados á figura do literato.