Unha ruta a pé de 12,65 quilómetros conectará este sábado, 3 de outubro, O Barco de Valdeorras e A Rúa polo Camiño de Inverno. Organizada pola Asociación de Municipios do Camiño de Inverno a Santiago (AMCI), a actividade é gratuíta e ten un máximo de 60 prazas.
A andaina comezará ás 10 horas no Barco. A xornada inclúe unha visita ás Covas de Vilamartín de Valdeorras, pícnic e degustación. Tamén están incluídos o transporte en autobús, o acompañamento dun técnico de montaña e de guías, e o seguro.
Para facilitar a participación, un autobús sairá de Lalín ás 08 horas e recollerá despois en Chantada e no Barco. Outro sairá á mesma hora de Pantón e pasará por Monforte antes de chegar ao inicio da ruta. A organización comunicará por teléfono a hora concreta das paradas posteriores.
Os autobuses de regreso sairán ás 16 horas de Vilamartín de Valdeorras: un dirixirase ao Barco, Chantada e Lalín, e o outro a Monforte e Pantón. Quen se desprace polos seus propios medios deberá prever a volta, xa que só poderá utilizar o autobús se quedan prazas libres.
Pode participar calquera persoa que estea en condicións de completar o percorrido. Para solicitar praza, hai que enviar unha inscrición por persoa antes do xoves, 1 de outubro, ás 12 horas, a través dun formulario, aínda que o envío da solicitude non confirma a praza. A organización chamará a cada solicitante para confirmar a dispoñibilidade e, de ser o caso, o horario de recollida.
O programa continuará en outubro e novembro
Tras esta primeira saída, o programa continuará o 17 de outubro cunha ruta entre Pantón e Belesar e unha visita ao Mosteiro do Divino Salvador de Ferreira de Pantón. A terceira xornada está prevista para o 7 de novembro, cunha andaina entre Bandeira e Ponte Ulla e unha visita ao Pazo de Oca.