Lembra as covas dende meniña. Non en van na familia da vilamartinesa Sara Fernández López sempre se recorda ter cova. “Ata hai dez anos aproximadamente aínda elaborabamos viño nela, e hoxe conservamos os viñedos, pero témolos cedidos. E recordo dende sempre que o entretemento que tiña o meu avó por parte de pai era ir á cova. Do mesmo xeito que agora a partir das sete da tarde a xente ten o costume de ir o café, pois antes en Vilamartín ían as covas, constituían un punto de encontro da veciñanza”.
E precisamente desa vivencia arredor destas antigas adegas soterradas falará Sara Fernández López no pregón co que abrirá a XXV Festa das Covas de Vilamartín, na tarde do 4 de agosto. O acto está previsto a partir das 20:30h. en Cerdeirais no marco da chamada “A Pequena”, unha ruta pensada para que poidan desfrutar os coveiros que, ao día seguinte, atenderán as numerosas persoas que asistirán á Festas das Covas vilamartinesa.
Sara Fernández recibía con moita alegría a proposta que lle facían dende a Asociación de Coveiros de Vilamartín para ser a pregoeira desta edición 25ª edición da festa. “Para min é unha alegría e un gran orgullo que me teñan escollido, pero tamén unha gran responsabilidade. Entón un pouco de presión tamén sintes, sobre todo a medida que se vai achegando o día, porque lle vas falar á xente que te coñece de toda a vida”, matiza.
Confesa que non é bebedora de viño, “polo tanto diso no podo falar, pero si coñezo as covas e delas vou falar. Vexo que quizais hoxe as covas están baleiras do contido de viño que principalmente si tiñan anos atrás, e cheas de contido cultural, festivo, a xente vai alí a festexar”. Por iso adianta que no seu pregón vai abordar “o que significa esta celebración das covas para o pobo e as covas como festa”.
Sara Fernández, docente, será a segunda muller en ser pregoeira da Festa das Covas de Vilamartín, tras Silvia Rodríguez, pregoeira desta celebración no 2022.
