Na tarde do 30 de maio, o Auditorio Julio Vázquez da P. de Trives, encheuse de música. Nesta ocasión a cargo de tres coros infantís, no I Certame de Primavera organizado pola Coraliña Cantora.
O coro de voces brancas de Trives, dirixido por Sandra González, foi precisamente un dos tres que participaron no festival musical, compartindo escenario co coro do Colexio Padre Feijóo de Ourense e coa Escolanía Antonio Valbuena de León.
A Coraliña Cantora está formada por 25 voces brancas e debutou no Nadal de 2009 no Certame de Corais de Trives apadriñados polo Orfeón Trivés. Posteriormente teñen actuado dentro e fóra do Concello interpretando composicións cantadas a dúas e tres voces. “Dentro do seu repertorio podemos atopar cancións no noso idioma, aínda que sen excluir outras culturas e idiomas, de feito cantan composicións en castelán, en alemán, en latín, en francés, en inglés e zulú, incluíndo unha misa completa acompañada por guitarra” explican dende o coro. No concerto do pasado sábado, cantaron cinco temas: Hallelujah (Arranged by Philip Lawson); No man is an island (n.n./ARR. Kari Ala Pollanen); Dodili (Nira Chen arranged by Doreen Rao); Supercalifrigilisticoespialidoso (Richard Robert Shery); e Popurri Cantajuegos.
O coro do Colexio Padre Feijóo Zorelle de Ourense naceu no ano 2012 e está formado por 24 voces de nenos e nenas comprendidos entre os 5 e os 14 anos. No certame de Trives interpretaron: Do, Re, Mi; Singing all together; Hallo Django; Nanaitana; e Ahora más que nunca (Alejandro Abad).
O terceiro coro participante, Escolanía Antonio Valbuena de León, foi fundada en 1985 e ten realizado concertos en España, Italia, Portugal, Francia, Austria e Dinamarca. No de Trives, interpretaron outros cinco temas: My heart will go on, B.S.O. de Titanic (J.Horner/ W. Jennings); Canço de bres per una princesa negra (A. Rodríguez Sábanes); Bohemian Rhapsody (Freddie Mercury); Aleluya (Leonard Cohen); e Kalinka (Rusia).