Unha saída de vía producida na mañá deste xoves 25 de xullo en Vilardevós saldábase co coche accidentado apoiado sobre o tellado dunha vivenda e catro persoas feridas que eran evacuadas ao Hospital de Verín en ambulancia, tal como indican dende o 112 Galicia, asegurando que “na casa ninguén resultou ferido”.
Era o propio ocupante da casa, situada en Florderrei Vello (Arzádegos), quen chamaba para alertar de que “un coche caera por un terraplén e acabara apoiado sobre o tellado dunha edificación anexa á súa casa”, indicando ademais que “ningunha das persoas que viaxaban no vehículo accidentado estaba atrapada”.
Desde o Centro Integrado de Atención ás Emerxencias solicitaban a acción de Urxencias Sanitarias de Galicia-061, dos Bombeiros de Verín, da Garda Civil de Tráfico e dos voluntarios de Protección Civil de Vilardevós.
