Pasadas as dez da noite do venres 14 de febreiro producíase un accidente de tráfico nas proximidades de Raigada (Manzaneda), na estrada OU-0701 (Cabalar-Vilariño de Conso). Un vehículo saíase da vía pola marxe dereita e caía por un desnivel de 50 metros de profundidade dando varias voltas. Era o seu propio condutor, veciño de Trives, quen alertaba ao 112 Galicia do sucedido.
“A persoa, que apenas tiña unhas mazaduras e rabuñadas, saíu do coche polos propios medios e trataba de subir de novo á estrada mentres chamada ao 112 Galicia para explicar canto lle acontecera e dar os datos máis precisos posibles sobre a súa localización. Mesmo recordaba o último lugar polo que pasara e cara a onde se dirixía. Datos que resultaron de moita utilidade ao persoal do 112 Galicia para enviar a axuda necesaria no menor tempo posible”, segundo informa o 112 Galicia.
Malia que nun primeiro momento o condutor rexeitaba a asistencia médica, “o persoal do Centro Integrado de Atención ás Emerxencias de Galicia informou aos profesionais de Urxencias Sanitarias de Galicia-061 para trasladar ao ferido a un centro médico e proporcionarlle os coidados necesarios”, citando ao 112 Galicia.
Ademais, solicitouse a colaboración no operativo dos voluntarios de Protección Civil de Manzaneda e do GES de Castro Caldelas, que confirmaron que “o vehículo caera por un terraplén duns 50 metros de profundidade, nunha zona de difícil acceso. Despois de recuperar as pertenzas do afectado e desconectar a fonte de alimentación eléctrica do coche, os servizos de emerxencias retiráronse do lugar sen máis incidencias”, segundo o 112 Galicia.
Pola súa banda, os axentes da Garda Civil de Tráfico encargáronse de recoller toda información relacionada co sinistro. Ata o lugar tamén se desprazaba o alcalde de Manzaneda.
Fotos: Voluntariado de Protección Civil de Ourense.
