A lousa é un material ideal para a construción de muros de contención, diques ou rompeolas. Son algúns exemplos de edificacións do uso desta roca en enxeñería civil que os técnicos do Clúster da Pizarra de Galicia poñían en valor esta mañá ante un grupo de estudantes universitarios da Escola Técnica Superior de Camiños, Canles e Portos da Universidade da Coruña (UDC) que visitaba a sede do organismo, en Carballeda de Valdeorras, xunto a unha das súas profesoras, María José Mijares.
Desde o Clúster resaltábase ante os futuros enxeñeiros todo o potencial que ten a lousa como elemento construtivo, máis aló do seu emprego en arquitectura (un ámbito no que este material xa goza de gran aceptación e popularidade). Con todo, promocionar o seu emprego en obras de enxeñería civil segue constituíndo unha premisa prioritaria para as empresas do sector, sempre que se trata dunha área no que a lousa ten -en termos xerais- menos presenza.
Ademais de achegarse á sede do Clúster, os universitarios desprazábanse ata a mina da Fraguiña, da empresa Cafersa. Ademais, visitaron a nave de Pizarras Castrelos e finalizaron a súa vista na canteira a ceo aberto de Pizarras VazFer.
“A finalidade da axenda que elaboramos en Carballeda de Valdeorras para este grupo da Escola Técnica Superior de Camiños, Canles e Portos da UDC non é outra que a de facilitarlles o contacto directo con diferentes puntos de interese para que poidan coñecer, de primeira man, todo o proceso produtivo ao redor da lousa”, sinala Víctor Cobo, presidente do Clúster da Pizarra de Galicia.
