A Sala Capitol de Santiago de Compostela vén de acoller a presentación da iniciativa impulsada por Turismo de Galicia para poñer en valor os diferentes territorios vitivinícolas galegos como destinos enoturísticos. Trátase da “Primavera de Portas Abertas das Rutas do Viño de Galicia” que, durante varias fins de semana, terá lugar en distintos puntos de Galicia que contan con viños amparados por selos de calidade.
Valdeorras é a encargada este ano de abrir a iniciativa. Así, a comarca será a primeira en celebrar este ano a súa Primavera de Portas Abertas. En concreto, farao na fin de semana do 5 ao 7 de maio, tal e como sinalaba neste acto a vicepresidenta da Ruta do Viño de Valdeorras, Montserrat Rodríguez, quen ademais agradecía á rede hostaleira e de restauración da comarca a súa implicación na iniciativa.
Neste sentido, destacou que hoteis, albergues e restaurantes deseñaron paquetes especiais durante a fin de semana de Primavera de Portas Abertas para que os visitantes “podan aloxarse ou gozar da riqueza culinaria de Valdeorra a prezos moi especiais”. Aseguraba ademais que “temos unha implicación cada vez maior por parte deste sector, o que demostra que todos remamos nunha dirección común: a de facer que os que veñen a Valdeorras se sintan cómodos, como na casa, descubrindo unha terra única, unha porta de entrada natural a Galicia. onde discorre o Camiño de Inverno”, apuntou Montse Rodríguez na presentación.
“Estou segura de que estes visitantes converteranse así nos mellores embaixadores da nosa terra, trasladando o noso potencial a terceiros. Unha cuestión fundamental para conseguir desestacionalizar o turismo na nosa comarca”, apuntaba a representante da Ruta do Viño de Valdeorras.
Montse Rodríguez detallou finalmente a completa axenda de actividades que se perfilaron para diferentes tipos de público en Valdeorras do 5 ao 7 de maio no marco da iniciativa. “Porque o enoturismo, aínda que se centra no mundo do viño, dá un paso máis e convida a mergullarse nun territorio de forma integral”, concluíu.
15 actividades programadas
A Ruta do Viño de Valdeorras programou do 5 ao 7 de maio na comarca a axenda formada por 15 actividades diferentes para que os interesados poidan gozar do patrimonio natural e paisaxístico, histórico e, por suposto, enogastronómico da zona.
Nesta axenda sobresae unha ruta en eBike, ao longo dun tramo de 42 quilómetros, polo parque natural da Serra da Enciña da Lastra; unha actividade que permitirá coñecer as paisaxes e os viñedos de Larouco, un concello moi ligado ao viño, da man dun arqueólogo; unha acción divulgativa sobre o viño de Valdeorras na Idade Media ou visitas á fortaleza do concello do Bolo.
Tamén se poderá, entre outras actividades, gozar do canto de regueifeiras, mentres se cata un viño, ou participa nunha actividade lúdica mixta que propón unha cata vertical acompañado de karaoke, para os que se animen a cantar os clásicos de sempre.
Na web rutadelvinovaldeorras.com é posible consultar a axenda completa de actividades indicadas para a fin de semana de portas abertas de primavera no comarca e inscríbete en cada un deles.
O viño galego como elemento dinamizador
Na presentación da “Primavera de Portas Abertas das Rutas do Viño de Galicia” contábase coa presenza de representantes das outras Rutas do Viño da comunidade, así como do conselleiro do Medio Rural, José González, quen puxo en valor o viño galego como principal elemento dinamizador dos territorios que compoñen as cinco denominacións de orixe vitivinícolas da nosa comunidade. Neste sentido, cualificou as rutas do viño como un “XPS singular” para coñecer estas cinco denominacións -Valdeorras, Ribeiro, Rías Baixas, Ribeira Sacra e Monterrei- e canda elas, recoñecer os viños de calidade. Foi na clausura da Primavera de portas abertas nas Rutas dos Viños de Galicia organizada pola Axencia Turismo de Galicia.
Así, como demostración dese apoio, o conselleiro citou iniciativas como a Estratexia de dinamización económica, territorial e turística das comarcas vitivinícolas de Galicia, impulsada pola Xunta da man do sector. Esta folla de ruta persegue potenciar os ámbitos produtivo, industrial e distribuidor do sector e outros eidos vinculados a el, como son o turismo, o patrimonio ou a paisaxe.
Deste xeito, o gran obxectivo da Estratexia é mellorar o posicionamento dos viños galegos, aumentar a súa competitividade en mercados nacionais e internacionais e transformar, de aquí a 2026, a capacidade de xeración de valor dos territorios nos que se produce. No seu desenvolvemento xogará un papel fundamental a futura Lei de calidade alimentaria, así como a Lei de recuperación da terra agraria, para garantir a rendibilidade do sector do viño e a súa sustentabilidade, así como a remuda xeracional. Nesa liña, entre instrumentos de recuperación e reestruturacións parcelarias, xa son arredor de 35.000 hectáreas as que que están a ser mobilizadas na comunidade desde 2020, moitas delas destinadas á plantación e cultivo de vide.
Así mesmo, o conselleiro salientou o peso do sector vinícola galego, que agrupa máis de 10.000 viticultores e case 450 adegas, cunha superficie que supera as 8.700 hectáreas de viñedos.
