A zona barquense de Veigamuíños-Tremiñá prepárase para viaxar no tempo séculos atrás. O seu XII Mercado Medieval celebrarase os días 18 e 19 de xullo. Nel combínase o aspecto cultural coa tradición, o comercio e a festa ao longo dunha fin de semana na que esta localidade barquense voltará ao pasado para revivir a súa etapa medieval. E para facelo recreará o ambiente popular, lúdico e alegre dun antigo mercado.
Dende a praza, as serpenteantes rúas de Tremiñá acollerán ao redor de 70 postos de diversos produtos, que se estenderán ata o camiño de Xagoaza. Froita, doces, verduras, bisutería, roupa, libros, licores, tazas, artesanía da pedra e do coiro… serán algúns dos artigos que estarán expostos e que se porán á venda no marco desta feira, promovida pola Asociación de Mulleres Rurais de Veigamuíños en colaboración co Concello do Barco.
O mercado cobrará vida a partires das 18h. do sábado 18 de xullo. Ademais da apertura dos postos de venda haberá diversas actividades. Entre elas, demostracións de oficios tradicionais de fiada, palilleiras ou cestería ás sete da tarde. Ademais comezará a xogarse a sexta edición do torneo de bolos desta mostra.
A música tomará o relevo dende as oito da tarde coa actuación do grupo de pandereteiras de Veigamuíños, que percorrerán as rúas. A esa mesma hora, pero na praza, farase entrega dos premios do VII Concurso Literario en lingua galega deste Mercado Medieval, cuxa temática nesta edición é a felicidade. Ás 21h. está programada unha actuación de danza medieval na praza. Posteriomente, ás 22:30h., poderá desfrutarse dun concerto do grupo valdeorrés Los Correctos.
Esta celebración medieval retomarase o domingo 19 de xullo no que destacará a tradicional de mostración de malla e a criba que se desenvolverá pola tarde.
Texto: Ángeles Rodríguez
Máis información na edición en papel do Periódico O Sil de xullo
