Preto de catrocentos nadadores de toda Galicia participaban, nos diferentes grupos de idade, no campionato galego máster celebrado en Pontevedra durante a fin de semana do 14 e 15 de xaneiro. Entre eles, deportistas de tres clubs ourensáns: Adas Natación, Escualos e Pabellón Ourense. Deste último, foron 17 os deportistas que participaban na expedición, logrando uns resultados “moi satisfactorios, con multitude de metais nas diferentes probas individuais e de relevos”, aseguran dende o club.
En total foron 29 as medallas, coas que os pabellonistas regresaban da capital do Lérez: 12 de ouro, 11 de prata e 6 de bronce, “ademais de 6 récords galegos en grupos de idades”, engaden dende o club ourensán que lograba o 9º posto na clasificación por equipos, sendo o club da provincia mellor clasificado.
Despois destes resultados, dende a dirección técnica do CN Pabellón xa están pensando no vindeiro autonómico de verán que se celebrará en Ourense no mes de xuño.