Este domingo, 26 de setembro, retorna ao calendario de competicións deportivas o Descenso do Miño, proba raíña do piragüismo que este ano alcanza a súa 52ª edición. Logo da ausencia desta actividade en 2020 por mor da pandemia, este ano retómase esta proba coa participación de 26 equipos, con 264 embarcacións e 336 deportistas. Destes piragüistas, 120 sairán de Os Peares -17 km de lonxitude con meta en Velle- e 216 de Barra de Miño -8km con meta en Velle, igualmente-.
O LII Descenso do Miño foi presentado esta esta mañá no hangar de deportes náuticos de Velle coa presenza de Mario Guede, concelleiro de Deportes; César Fernández, vicepresidente segundo da Deputación; Manuel Pérez, delegado da Xunta de Galicia para o Deporte en Ourense; e José Luis Fernández, presidente da Escuela Orensana de Piragüismo.
“Recuperamos pouco a pouco a normalidade nas competicións deportivas cun proba que é todo un referente dentro do Piragüismo do noso país”, recalcou o concelleiro de Deportes, Mario Guede. Pola súa banda, o presidente da Escuela de Piragüismo agradeceu a implicación das institucións para “non deixar escapar outra edición”, logo da ausencia de 2020, e louvou un percorrido “esixente” pero moi do gusto dos asistentes.
Na anterior edición, disputada en 2019, foron 28 os equipos participantes, con 273 embarcacións e 362 deportistas. O evento deportivo desde domingo comezará ás 11:00 horas, con saída tanto desde Os Peares como desde Barra de Miño. Haberá diferentes categorías, desde os 15 até os 60 anos, e participarán homes e mulleres indistintamente.
A hora de remate aproximada será ás 13:00 horas, estando previstas a entrega de premios en torno ás 13:30 horas.
A proba está organizada polo Consello Municipal de Deportes coa colaboración da Escuela Orensana de Piragüismo, a Federación Galega de Piragüismo, Xunta de Galicia (a través da Secretaría Xeral para o Deporte), Deputación de Ourense, o Concello de Coles, o Concello de Nogueira de Ramuín e a Deputación Provincial.
