Agora si. Na tarde deste sábado 31 de maio o CD Barco pechaba a tempada por todo o alto, levantando a XLIV Copa Deputación de Ourense “Miguel Ángel”, tras unha intensa final disputada no estadio do Couto ante o CD Velle que vencían por un contundente 6-2.
Logo de gañar a liga e lograr o ansiado ascenso á Terceira Federación, os de Lino Estévez buscaban o dobrete nesta tempada e resarsirse da derrota sufrida na final da tempada pasada mentres que o Velle aspiraba a levantar a súa sétima Copa, pero nesta ocasión todo estaba de parte do valdeorreses aínda que foi un partido intenso por ambas partes.
Así, tras un gran inicio do CD Velle no Couto, chegando a adiantarse 0-2 no marcador; o CD Barco reaccionaba e en cuestión de oito minutos lograba empatar o encontro para chegar ao descanso cun 2-2 e todo por decidir no segundos corenta e cinco minutos. Brian Castro recurtaba distancias aos trinta e catro minutos (1-2) mentres que o segundo gol barquense era obra de Óscar Martín.
Nada máis comezar o segundo tempo, no minuto 47 Brian Castro marcaba o seu segundo gol, adiantando aos valdeorreses no marcador. No minuto 64 Sidibé poñía o 4-2 e no 83′ marcaba Rogerio. Con todo o broche poñíao Alejandro ao transformar un penalti no minuto 90.
O presidente da Real Federación Galega de Fútbol, Pablo Prieto, e o presidente da Deputación de Ourense, Luis Menor, entregaron as medallas e os trofeos aos dous equipos.
Máis fotos:
O CD Barco levanta a Copa Deputación de Ourense despois de 44 anos
