Tras o pequeno descenso rexistrado onte, nesta xornada de domingo 3 de xaneiro volven subir os positivos de Covid-19 na Área Sanitaria de Ourense, Verín e O Barco. Rexístranse un total de 605, 10 máis que onte, segundo os últimos datos publicados esta mañá pola Consellería de Sanidade e actualizados ás 18h. do 2 de xaneiro.
Dese total de positivos, 23 están hospitalizados en planta (1 máis que onte) e 3 na Unidade de Coidados Intensivos (1 máis que onte). Ademais soben os novos casos confirmados por PCR nas últimas 24 horas un total de 28 (fronte aos 14 de onte).
No que se refire aos ingresos, o Hospital Público de Valdeorras está hoxe, despois de moitas semanas, libre de virus, o mesmo que o Hospital de Verín, mentres o Hospital Universitario de Ourense rexistra 23 en planta (2 máis que onte) e 3 na Unidade de Coidados Intensivos (1 máis que onte).
O total de casos rexistrados ata o de agora na provincia ascende a 8.683, con 7.768 curados e 309 falecidos (onte Sanidade non notificaba ningún falecemento). Polo de agora lévanse realizado 137.290 probas PCR e 68.012 probas serolóxicas.
