Cos albores do día, preto das oito da mañá do 14 de setembro, antes das primeiras luces da xornada festiva, un grupo de persoas de diferentes idades, homes, mulleres e nenos, vanse achegando ata A Capitana, a carón do río Sil no Barco de Valdeorras. Son os intrépidos e animados participantes no Madrugón, unha cita, a medio camiño entre a diversión, a valentía e o deporte, ineludible e tradicional, que marca o comezo do Día do Cristo dende hai case trinta anos.
O día chegou e mañá, un ano máis, os participantes reuniranse en torno ás oito menos dez da mañá no punto de saída para comezar a carreira que os levará río abaixo, por uns 400 metros de distancia ata a praia fluvial no Malecón onde, os familiares e amigos que teñan a ben acompañalos, esperarán coas toallas e a roupa preparada. Porque se hai algo que caracterice esta proba, é a valentía que ano tras ano demostran os participantes. Xa non se trata unicamente de madrugar senón de soportar as baixas temperaturas da mañá e sobre todo do río que a mediados do mes de setembro son pouco menos que xélidas, antes da saída do sol.
E tralo chapuzón, coma sempre o premio máis gratificante será un bo chocolate con churros no Cafetín, despois da entrega dos premios. Haberá trofeos ao primeiro nadador e nadadora, tamén haberá premios para os primeiros menores de 15 anos (nena e neno); para o traxe de baño máis orixinal (masculino e feminino); un xamón para o conxunto con traxes de baño máis orixinais; outro para a familia que máis membros presente; e outro para o club que presente mais deportistas. Igual que o ano pasado, todos os participantes levarán unha toalla conmemorativa como recordo desta edición.