O vindeiro 22 de outubro está prevista a inauguración na Vella Cárcere de Lugo da exposición Fuxan os vento, 50 anos de historia. O cartel anunciador desta mostra está ilustrado cunha fotografía tomada en 1978 por Francisco Sandiás “Pancho”, nun concerto que este grupo daba no barrio barquense das Casas Baratas.
A data da inauguración da exposición coincide cos 50 anos do seu primeiro concerto, alá por 1972 no III Festival das San Lucas de Mondoñedo. Medio século despois a mostra pretende lembrar unha das agrupacións máis emblemáticas da música galega a través de material moi diverso: fotografías, carteis, instrumentos, poemas, partituras, audios inéditos…
A partir deles os visitantes poderán percorrer a cronoloxía e o mundo creativo do grupo, nunha exposición que, ademais, conta coas achegas de múltiples persoas e entidades culturais do país. “Fuxan os Ventos” poderá visitarse ata o 22 de xaneiro.
A imaxe escollida polo grupo para esta mostra polo seu 50 aniversario é da autoría do fotógrafo barquense Francisco Sandiás “Pancho”. Tanto esta instantánea como a que amosamos tras estas liñas, da mesma actuación, están incluídas no catálogo da exposición “Catálogo das pequenas cousas”, promovida polo Concello do Barco en novembro de 2012.