Ata Portugal chegaba a exposición “Pizarra”, organizada polo Clúster da Pizarra de Galicia. A mostra puido verse en Coimbra como parte do programa de arquitectura de Anozero’24, Bienal de Arte Contemporânea da cidade lusa, desenvolta entre o 6 de abril e o 30 de xuño.
Esta mostra “Pizarra” achega unha escolma de fotografías de Juan Rodríguez, seleccionadas polos arquitectos Carlos Quintáns e Zaida García Requejo. Nelas retrátanse distintas canteiras de lousa, nas que se aprecia a escala das intervencións e a forma na que van variando, tanto polos procesos extractivos como polas condicións ambientais. O autor mostra o contraste entre o artificial do corte da canteira e o natural, coas xeometrías resultantes do proceso e cos planos de corte.
Esta iniciativa serve, ademais, para contextualizar a relevancia socioeconómica da actividade louseira, especialmente na zona de Valdeorras onde habitualmente sitúanse as canteiras. Ademais, pon en valor un material de gran potencial para a construción, tanto de obra privada como pública.
A localización elixida para a exposición foi o mosteiro de Santa Clara. En concreto, unha sala abovedada, realizada coa pedra extraída a poucos metros da propia canteira do mosteiro. Estes espazos contan coa singularidade de que o arranque dos arcos está marcado por grandes pezas de lousa.
A exposición que chegou a Coimbra é unha selección de 12 imaxes da mostra orixinal, que percorreu previamente noutros espazos. En novembro e decembro de 2023 visitou o Centro Cultural Marcos Valcárcel, en Ourense. En xaneiro deste mesmo ano estivo na sede de Afundación de Abanca, en Vigo. As fotografías acompañáronse con pezas de lousa formando distintas composicións.