No concello da Pobra de Trives celébranse durante o verán dúas festas con gran tradición que ademais constitúen un elemento de dinamización da economía local. Trátase dos festexos de San Bartolomé, previstos entre o 23 e 26 de agosto, e os da Dolorosa (mediados de setembro).
Por isto, e tendo en conta que o número de visitantes aumenta de forma significativa durante estas datas, a alcaldesa de Trives, Patricia Domínguez, vén de asinar un decreto que autoriza a ampliación excepcional de dúas horas no horario de peche dos establecementos hostaleiros nas noites dos días 24, 25 e 26 de agosto e 14, 15 e 16 de setembro.
“A ampliación do horario durante a celebración das festas de San Bartolomé e A Dolorosa é unha demanda reiterada dos hostaleiros que atende o Concello da Pobra de Trives ao tratarse duns festexos que contribúen a dinamizar a economía local”, indican dende o grupo de goberno.
As festas de San Bartolomé comezarán mañá cun amplo programa de actividades que se estenderá ata o luns e no que se inclúen as actuacións de orquestras e grupos musicais, actividades para os nenos e nenas e ata un campionato de tute. O deporte tamén será protagonista coa carreira de San Bartoliño, o Día da Bici e o torneo de fútbol sala.