Na mañá deste martes 27 de agosto un home era trasladado logo de quedar atrapado ao envorcar un tractor no Irixo, tal como indican dende o 112 Galicia.
O suceso tiña lugar en Vila, na parroquia de Santa María de Campo, sendo un particular quen daba o aviso en torno ás 11:15 horas. “Durante a súa chamada, o alertador indicou que un veciño do Irixo quedara atrapado polas pernas logo de que un tractor envorcase”, indican dende o 112, cuxos xestores puxeron os feitos en coñecemento do Servizo de Urxencias Sanitarias de Galicia-061, que mobilizaba o helicóptero medicalizado con base en Ourense ata o punto. Tamén eran avisados os Bombeiros do Carballiño para poder liberar ao ferido.
“Os Bombeiros, coa colaboración do alertador, acudiron ata o punto, onde tiveron que empregar o material de excarceración para poder evacuar a vítima, pois estaba atrapada por unha perna. Logo diso, e aínda que o helicóptero se desprazou ata o lugar, o ferido foi trasladado en ambulancia ata o hospital de referencia”, aseguran dende o 112 Galicia.
