Un total de 4.256 aspirantes están chamados a participar nas oposicións que se celebrarán esta fin de semana no recinto da Feira Internacional de Silleda para acceder a 274 prazas de emprego público de acceso libre.
As probas comezarán mañá sábado, ás 9,00 horas da mañá para cubrir 42 prazas da especialidade de recursos naturais e forestais do subgrupo AP ás que están convocadas 808 persoas; e a partir das 15.30 h. será a quenda dos 884 aspirantes convocados para 96 prazas da escala técnica de xestión ambiental B/C1.
O domingo 17 de novembro ás 9.00 h. realizarase o proceso selectivo para a escala superior de orientación laboral A1, no que están chamadas a participar 474 persoas para 6 prazas; e a partir das 15.30 h. terá lugar o exame para a escala técnica de orientación laboral A2 con 2.090 aspirantes admitidos e 130 prazas ofertadas.
Operativo de seguridade
Un operativo formado por aproximadamente 207 persoas controlará que todos os procesos selectivos se desenvolvan de xeito correcto e con total seguridade. O recinto feiral de Silleda disporá tamén dunha ambulancia, habilitada pola Administración galega para atender calquera incidencia que se puidese producir durante a realización das probas.
As persoas que concorran a estes procesos selectivos poderán consultar toda a información relativa ás probas e ás medidas de seguridade no portal corporativo https://www.xunta.gal/funcion-publica.
Desde o último trimestre de 2023 ata agora, convocáronse 40 procesos selectivos, dos que 22 foron de acceso libre, 15 de promoción interna separada e tres para persoas con discapacidade intelectual.
O total de prazas convocadas relativo a estes procesos ascende a 1.495 e recibíronse 21.534 solicitudes.