Coa entrega dos correspondentes diplomas vén de concluír o obradoiro SilLor X que no 2023 poñían en marcha conxuntamente os concellos de Quiroga, Ribas de Sil e Folgoso do Courel baixo o amparo da Consellería de Emprego e Igualdade. As catro institucións representadas polos tres alcaldes, José Luis Rivera, Roberto Castro e Lola Castro, e pola Directora Territorial de Emprego, Carmen José, encargáronse da entrega dos diplomas.
En total foron 20 alumnos traballadores, -repartidos en 7 para o Concello de Ribas de Sil, 7 para o de Folgoso do Courel e 6 para o de Quiroga, promotor do obradoiro-, os que participaron neste obradoiro especializado en “Operacións básicas de revestimentos lixeiros e técnicos en construción”.
Os alumnos traballadores, durante os doce meses de traballo – aprendizaxe do obradoiro, realizaron en Quiroga traballos de acondicionamento no edificio multiconfesional, encargáronse da reparación dos vestiarios do campo de fútbol San Martiño, do acondicionamento do Centro Social de Quiroga e da reparación das piscinas municipais. No Concello de Ribas de Sil traballouse na Escola de Peites, na de Nogueira e no pavillón municipal. E no de Folgoso do Courel mellorouse a escola de Mostaz, a de Miraz de Arriba e en vías, camiños e espazos públicos.
Os tres rexedores fixeron fincapé en que os obradoiros duais de emprego son programas públicos de emprego e formación que teñen por finalidade mellorar a ocupabilidade das persoas desempregadas.
Destacaron tamén o esforzo importante que deben facer os concellos para levar a cabo estes proxectos coa finalidade de dar unha oportunidade de traballo aos veciños, polo que cando hai falta de compromiso por parte dalgún alumno – traballador prodúcelles tristura.
A directora territorial de Emprego, Carmen José, fixo fincapé en dous puntos, por un lado destacou a empregabilidade (finalidade destes obradoiros), como ferramenta para o asentamento de poboación nestes territorios; e por outro o beneficio que supón para toda a comunidade as obras que realizan.
O novo obradoiro remataba cunha gran foto de familia e anunciaba tamén o inicio no novo obradoiro SilLor 11, no que non poden participar os mesmos alumnos pero si dará cabida a outras 20 persoas para que comecen a súa aprendizaxe.
Fotos: Concello de Quiroga.