O C.R.D.O. Ribeiro, xunto co resto de Consellos Reguladores galegos que conforman ACRUGA participou en Londres (Reino Unido) nunha exitosa xornada de exhibición e cata de viños dirixida exclusivamente a profesionais do sector, á que asistiron preto da centena de expertos, entre eles, seis Master of Wine, como os ingleses Mathew Forster MW, Jancis Robinson MW, Christopher Martin MW ou o primeiro español en lograr o título, Pedro Ballesteros MW .
O evento celebrouse durante unha xornada no salón Saint James do afamado Club 67 Pall Mall, un dos espazos especializados dedicado ao viño de maior prestixio da cidade do Támesis. A D.O. Ribeiro participou cun túnel de viños cun total de 24 referencias distintas, algunhas xa presentes no mercado británico, cuxos produtores queren consolidar as súas vendas neste destino, xunto a outras marcas que aínda non foron exportadas a Gran Bretaña.
“Reino Unido é un mercado dun gran valor para nosa D.O., é un dos maiores importadores de viño do mundo e, en concreto, dos viños galegos. Cualitativamente o mercado británico é un referente mundial no sector, conta cunha gran cantidade de prescritores e críticos vinícolas asentados neste país que fan que se vaian actualizando continuamente as tendencias no mercado”, indica Concha Iglesias, presidenta do C.R.D.O. Ribeiro, en relación á participación nesta acción conxunta.
Calidade e diversidade
O II Salón dos Viños e Augardentes de Galicia mostrou ao público profesional asistente a calidade e diversidade das elaboracións da Galicia vitivinícola, co seu forte sinal atlántico, así como os seus destilados.
ACRUAGA -que naceu en 2021- activou esta acción promocional no marco dun convenio asinado co IGAPE, con diferentes obxectivos, entre eles o de favorecer e impulsar o grao de coñecemento dos viños e licores galegos a través de accións de visibilizacion, divulgativas e formativas conxuntas en diferentes puntos de España e do estranxeiro.
Un convenio que xa favoreceu que diferentes viños e destilados de Galicia participasen no mes de febreiro deste ano, baixo un mesmo espazo expositor, en Vinexpo, unha das feiras máis relevantes do sector, que anualmente se celebra en París.