Co tradicional canto, de casa en casa, comezaba na noitiña do 2 de xaneiro a antiga Festa de Reis na Mezquita.
Ese mesmo percorrido repetíano a partir das 10h. deste 3 de xaneiro dende a Casa dos Reis para recoller os aguinaldos. Desta volta a comitiva dos Reis (encabezada polas autoridades: Rei, Hugo, e Virrei, José Antonio, Raíña, Paula, e Virraíña, Manoli), ía acompañada polos Zamarreiros, uns personaxes enmascarados que só aparecen nesta data. E, por primeira vez nesta ocasión un deles era unha muller, Paquita. “A única e primeira zamarreira ata o de agora”, conta ela mesma.
Ademais, levaban un carro, adornado polos ramos de Reis, e no que se ían depositando os aguinaldos dos veciños: chourizos, xamóns, doces, cartos…
Tras completar a ronda pola Mezquita, animada pola música tradicional de Tatoo, homes e mulleres celebraban, por separado, o seu primeiro xantar desta festa que se prolongará nos vindeiros días.
Fotos: Carlos G. Hervella.
