Valdeorras prepárase para acoller unha nova edición da Primavera de Portas Abertas, unha cita imprescindible para os amantes do viño, a natureza e a gastronomía que terá lugar do 15 ao 17 de maio. Durante eses tres días, a Ruta do Viño de Valdeorras ofrecerá un amplo abanico de actividades pensadas para todos os públicos nunha contorna natural e cultural privilexiado.
A programación arrincará o venres 15 de maio co Túnel do Viño (20h), unha experiencia de cata en formato libre que permitirá aos asistentes descubrir ata 28 viños da denominación nun ambiente distendido, ao aire libre e acompañado de música. Ao longo da xornada, os visitantes tamén poderán desfrutar do Parque Natural Serra Enciña da Lastra, un dos espazos naturais máis singulares de Galicia.
O sábado 16 de maio será o día central do evento, con propostas que combinan deporte, cultura, benestar e enoturismo. Entre elas destacan a ruta de montaña con ascenso a Pena Trevinca, o paseo cultural “Temos un camiño” polo Barco de Valdeorras, e unha experiencia de meditación entre viñedos que inclúe visita a adega e degustación. Ademais, O Bolo ofrecerá visitas guiadas ao seu patrimonio histórico, incluíndo santuario, castelo e museo.
Para quen busca experiencias máis exclusivas, as adegas do roteiro deseñaron actividades premium como catas de espumosos, catas a cegas, percorridos por covas e viñedos, así como eventos que combinan viño, música e gastronomía. A xornada completarase con propostas gastronómicas como ceas cóctel e degustacións de produtos locais.
O domingo 17 de maio, o programa invita a desfrutar con calma da esencia de Valdeorras. Entre as actividades previstas inclúense a cata “Entre viños e queixos”, roteiros de sendeirismo con historia como a de San Xil e Pa de Cabras, e unha sesión vermú para despedir a fin de semana nun ambiente relaxado.
Durante toda a fin de semana, os asistentes poderán participar en visitas guiadas a adegas con degustación, desfrutar de menús especiais en restaurantes da zona maridados con viños do D.O., así como beneficiarse de ofertas en aloxamentos.
Esta iniciativa é posible grazas á colaboración da Axencia de Turismo de Galicia, que apoia a promoción do enoturismo como motor de desenvolvemento do territorio. Para máis información sobre o programa completo e a reserva de experiencias, os interesados poden consultar a web oficial da Ruta do Viño de Valdeorras.