As choivas despois das talas de madeira nos montes da serra están a provocar graves problemas de arrastres nalgunhas zonas do Concello e, nomeadamente, nas captacións de auga que dan servizo á poboación. “Estes arrastres están a provocar unha turbidez importante en todas as zonas de abastecemento”, indican dende o Concello que “de xeito preventivo e até que as analíticas nos confirmen a boa calidade da auga, establece restricións ao consumo tanto na ZA de Santo Estevo como en Somoza e na ZA Santoalla (que afecta aos depósitos de Fontei e A Artística)”.
Dende o Concello adiantan que está previsto que as choivas se manteñan durante toda a semana polo que “con certeza as incidencias iranse reproducindo ao longo destes días”, lamentan, pedindo á cidadanía “comprensión e colaboración ante a gravidade da situación ao tempo que moita precaución no uso de termos, lavadoras e lavalouzas cando os niveis de turbidez sexan maiores”.
“O Concello informará de xeito continuo a través de bandos, RRSS e tamén da Axenda Municipal ao tempo que, de agravarse a situación, habilitará medidas extraordinarias de subministro de auga potable”, di a alcaldesa, lembrando que na explanada do LIDL no Barco de Valdeorras oConsorcio de Augas mantén habilitada unha fonte de auga de acceso libre con todas as garantías sanitarias.