José Antonio Quiroga, presidente da Confederación Hidrográfica do Miño-Sil (CHMS), presidiu a Xornada de lanzamento do proxecto RISC_PLUS no Centro Cultural Marcos Valcárcel de Ourense. O proxecto, apoiado polo Programa Interreg VIN-A España-Portugal (POCTEP) 2021-2027, representa un paso fundamental para aplicar os avances impulsados por este organismo de conca a través doutros proxectos europeos.
Na presentación, Quiroga estivo acompañado polos representantes das entidades socias no proxecto, Inés Andrade, directora da ARH-NORTE, Axencia Portuguesa do Ambiente(APA), Javier Rodríguez Rajo, Vicerreitor do Campus de Ourense da Universidade de Vigo; e Tiago Ferradosa, do Departamento de Engenharia Civil da Universidade do Porto
Cun enfoque específico nas concas internacionais dos ríos Miño e Limia, o proxecto RISC_PLUS ten como obxectivo establecer medidas que axudasen a paliar as consecuencias do cambio climático sobre os ríos; neste sentido, o proxecto busca mellorar o coñecemento hidrolóxico da demarcación internacional, os sistemas de axuda na toma de decisións fronte a eventos de seca prolongada, e mellorar os sistemas de axuda na toma de decisións fronte a eventos de inundación.
Cun orzamento de máis de 1.600.000€ e un prazo de execución que finalizará en decembro de 2025, o proxecto RISC_PLUS representa un avance significativo na xestión da auga na demarcación internacional. Así mesmo, o proxecto traballará no desenvolvemento de sistemas avanzados de toma de decisións para optimizar procesos fronte a secas e inundacións, permitindo enfrontar con eficacia o cambio climático e apoiando as actividades socioeconómicas.
“Estamos ante un proxecto que é unha continuación do anterior RISC MIÑO_LIMIA que supuxo un importante avance no coñecemento da conca”, incidíu Quiroga. “A través do mesmo, foi posible realizar unha exhaustiva análise da conca mediante a revisión da rede hidrográfica, así como, a obtención dun novo modelo dixital do terreo da parte portuguesa a partir dun voo LIDAR. Tamén se creou un novo sistema de alerta temperá fronte a inundacións, a través do que se obtén a previsión de caudais e da extensión da mancha de inundación, o que permite anticiparse aos fenómenos extremos; entre outros avances”, explicou o presidente.
Os socios mostraron a súa satisfacción pola coordinación e cooperación transfronteiriza que impulsa a seguir traballando ao unísono cara a un plan hidrolóxico conxunto entre territorios con características similares e con intereses comúns. “A prevención, protección e preparación fronte aos fenómenos extremos, inundacións e secas, é a clave para evitar os danos sobre as persoas e os seus bens”, concluía Quiroga.
