Esta fin de semana celebrarase na piscina Rosario Donas, do Pavillón dos Remedios, o Campionato Galego de Salvamento e Socorrismo en augas pechadas.
O Club Salvamento e Socorrismo Ourense Salvour exercerá de anfitrión nesta importante cita onde competirán os 190 mellores socorristas galegos nas categorías xuvenil, júnior e absoluto pertencentes aos clubs de Carballo (Sysca), Umia, Pontevedra(Sapo), Laracha(Sal), Cerceda, Sada( Sasa), Arteixo(Salvar), A Estrada e Vilagarcia.
O campionato celebrarase o sábado 19 e domingo 20 de marzo en xornadas de mañá e tarde onde se disputarán as probas de 200 metros natación con obstáculos, 100 metros remolque de maniquí con aletas, 100 metros combinada de salvamento, 100 metros socorrista, 50 metros remolque de maniquí e 200 supersocorrista, ademais de diferentes substitucións e o lanzamento de corda.
O Salvour presentarase a esta cita cos seus 6 mellores deportistas que lograron alcanzar a marca mínima necesaria esta tempada para poder acceder a este campionato: Eva Feijoo, Roi Naranjo, José Moure, Alejandro Santiso, Santiago Gutierrez e Iria Ruíz que loitarán por alcanzar os primeiros postos do podio.
