A Garda Civil de Ourense intensificará o control do cumprimento das medidas sanitarias do Covid-19 nos lugares de reunión nesta Comunidade durante as datas do Nadal. “Por mor da modificación da normativa do Covid na comunidade realizada pola Xunta de Galicia, cesando os peches perimetrais desde as 00:00 horas do día 23 de decembro ás 24:00 horas do día 25 de decembro do ano en curso, a Garda Civil centrará os seus esforzos na vixilancia e control das medidas sanitarias”, tal e como se informa dende o propio corpo.
Este aumento na vixilancia será realizado, principalmente, polas Unidades de seguridade cidadá e terá como obxectivo o “control de aforos, o cumprimento dos horarios de peche, as reunións ou festas privadas, o uso da correspondente máscara, a observación da distancia de seguridade interpersoal e o resto de medidas ditadas no Decreto da Xunta de Galicia”.
Este incremento non supón o cesamento dos controis de mobilidade que seguirán realizándose para garantir o cumprimento das restricións de mobilidade en horario nocturno. A Garda Civil lembra aos cidadáns que “é responsabilidade de todos evitar a propagación do Covid-19, instándoos a non relaxar as medidas sanitarias”.
