Primeiro foi Ourense, despois O Barco de Valdeorras e mañá, xoves 9 de abril será Verín o concello que acolla o espectáculo científico que o Parque Tecnolóxico de Galicia–Tecnópole organiza no marco do programa de actividades de celebración do décimo aniversario da maior feira científica de Galicia, a Galiciencia.
Máis de 300 alumnos de centros dos concellos de Xinzo, A Gudiña e Verín asistirán no IES García Barbón a un espectáculo científico que lles permitirá coñecer os fundamentos da luz a través de experimentos espectaculares.
Grazas ao espectáculo que se desenvolverá en tres sesións: ás 10, ás 11:15 e ás 12:30h. os asistentes terán a resposta a preguntas como ¿por que un raio láser non é capaz de atravesar un refresco de cola?, ¿como podemos ver as bacterias que hai nunha gota de saliva? ou ¿Como se fabrican os fogos artificiais?