Despois do éxito acadado na tempada 2019, o Pazo da Pena de Manzaneda (Ourense) e o Restaurante Merenzao (Doade, Lugo) reabrirán as portas do primeiro restaurante efémero de Entroido en Galicia: A Mázcara.
“Esta novidosa experiencia gastronómica terá lugar os días 21, 22 e 23 de febreiro nun espectacular pazo do século XVI en Manzaneda, e estará asinada polo chef monfortino Carlos Javier González”, explican dende o Pazo da Pena.
Co nome da A Mázcara réndese homenaxe ao personaxe ancestral do Entroido de Manzaneda (declarado Festa de Interese Turístico de Galicia), sobre o que se fundamenta a filosofía deste restaurante efémero: “a exaltación da cultura gastronómica propia do Entroido da montaña galega, a través dunha cociña coidada e elegante baseada no produto local e de tempada”, segundo o Pazo da Pena.
Este establecemento de hostalaría de Manzaneda funciona como aloxamento de luxo dende o ano 2015 e, na actualidade, sitúase como o pazo de turismo rural mellor valorado da RibeiraSacra. Pola súa banda, o Restaurante-Vinoteca Merenzao, propiedade do chef Carlos Javier González, permanece pechado durante a tempada invernal, favorecendo así o desprazamento do seu equipo para dar forma, por segundo ano consecutivo, a esta experiencia gastronómica.
A Mázcara só disporá de catro servizos que terán lugar durante a fin de semana do Entroido, e as reservas xa se atopan abertas:
· Venres 21 A Cea
· Sábado 22 O Xantar
· Sábado 22 A Cea
· Domingo 23 O Xantar
Reservas:
+34 674 225 854 // + 34 988 333 038 // informacion@pazodapena.com
