Pouco a pouco vanse relaxando as restriccións, de maneira escalonada en función da incidencia de cada área sanitaria, tamén no ámbito deportivo.
Así, segundo a Orde da Consellería de Sanidade de 25 de febreiro de 2021 publicada onte no Diario Oficial de Galicia na que se actualizan as medidas de prevención específicas contra a pandemia, o público poderá vover aos campos e pavillóns, sempre cumprindo os protocolos e o distanciamento de 1,5 metros e cunhas condicións lóxicas de aforo. Desde hoxe poderán asistir ás competicións deportivas o 30% da capacidade da instalación, cun máximo de 250 persoas no caso das instalacións interiores e de 500 nas exteriores.
A este respecto, que afecta de forma especial ao fútbol, dende a Federación Galega aseguran que “non se cubren as expectativas de todos, pero é un primeiro paso moi necesario. Sen dúbida, unha gran noticia para os clubs, que están a realizar un extraordinario esforzo por cumprir de maneira escrupulosa os protocolos e todas as restriccións impostas polas autoridades sanitarias. Todo sempre cunha gran comprensión porque todos temos claro cal é a prioridade: salvagardar a saúde”, apuntan.
Un dos clubs especialmente afectado é o CD Barco que precisamente este domingo xoga fóra, polo que Calabagueiros terá que esperar aínda unha semana máis para poder acoller aos afeccionados do club vermello.