OurenseÚltima hora

Aberto o prazo de inscrición para a IV edición da “Ourense Strade Termal by Ridley”

O evento cicloturista organizado polo Inorde disputarase o 30 de maio cun novo percorrido polos concellos de Entrimo, Lobeira, Bande, Calvos de Randín, Muíños e Lobios

Publicidade
Saída da pasada edición da Ourense Strade Termal en Lobios.

 

A IV edición da “Ourense Strade Termal by Ridley”, organizada polo Inorde e co apoio da Axencia de Turismo de Galicia, vén de abrir o prazo de inscricións cun novo percorrido, debido ás limitacións de mobilidade, que levará aos cicloturistas a percorrer os concellos ourensáns de Entrimo, Lobeira, Bande e Calvos de Randín, así como Muíños e Lobios que xa forman parte da historia da proba. O evento deportivo, que se disputará o vindeiro 30 de maio, ofrecerá aos participantes a oportunidade de coñecer novos portos de montaña nun percorrido esixente con espectaculares paisaxes, todo elo dentro do Parque Nacional do Xurés-Geres.

Os interesados en participar nesta proba cicloturística, poden inscribirse a través da páxina web ourensestradetermal.com ata chegar a cubrirse as 300 prazas ofertadas. Ademais, para as 100 primeiras inscricións ou ata o 31 de marzo, o custe para participar na proba é de 39 euros; logo ascende a 44 euros ata o 16 de maio, e desde ese día ata o 25 de maio, o prezo da inscrición será de 49 euros.

A proba, que está dentro do calendario nacional da Real Federación Española de Ciclismo, ofrece dous percorridos: o gran fondo de 125 quilómetros, e o medio fondo de 90 quilómetros. A saída e a chegada da proba estará situada no Concello de Lobios, no Balneario de Caldaria en Riocaldo.

 

Participantes da pasada edición da Ourense Strade Termal.

Artigos relacionados

Back to top button