Aceites Abril inauguraba esta mañá unha segunda liña de refinado na súa planta de San Cibrao das Viñas. Dita instalación, que complementa a xa existente desde 2015, garantirá a súa capacidade de produción para continuar a súa expansión nacional e internacional. A familia Pérez Canle, propietaria da empresa, acompañou a todos os asistentes durante a visita institucional encabezada polo presidente da Xunta de Galicia, Alberto Núñez Feijóo, quen estivo acompañado do conselleiro de Medio Rural, José González; vicepresidente da Deputación, Rosendo Fernández; o alcalde de San Cibrao das Viñas, Manuel Pedro Fernández Moreiras.
O conselleiro delegado de Aceites Abril, Luís Pérez Canal, foi o encargado de guiar á comitiva oficial tanto pola nova liña de refinado como pola planta de envasado. No transcurso deste percorrido procedeuse ao descubrimento dunha placa conmemorativa.
Posteriormente tivo lugar o acto oficial, onde Luís Pérez fixo un repaso pola historia desta empresa familiar fundada no tradicional barrio da Ponte, en Ourense, e que despois de 60 anos continúa incrementando as súas cifras de negocio e exportación, como unha empresa referente a nivel galego.
No seu discurso, o conselleiro-delegado destacou que “o investimento total do proxecto de ampliación alcanzou a cifra de oito millóns e medio de euros”. Esta obra, iniciada en novembro do 2019 e finalizada en 2021, complementa á primeira liña inaugurada no ano 2015, sendo a primeira deste tipo posta en marcha en Galicia. Estas instalacións permiten a Aceites Abril ampliar a súa capacidade de refinado, proceso mediante o cal “eliminan o exceso de acidez e cor do aceite procesándoo para convertelo en apto para o consumo”. Estas plantas, sumadas ás do porto de Vilagarcía de Arousa (uns tanques de almacenamento con capacidade para trece mil toneladas) son o resultado do proceso de modernización e ampliación que afronta a empresa desde 2015 e que supuxo un gran investimento para a empresa aceiteira ourensá.
Pola súa banda, o presidente da Xunta, Alberto Núñez Feijóo resaltaba a aposta polo rural, pola calidade e por Galicia de Aceites Abril. “Non en van, estamos a falar dunha empresa que, cunha facturación de 300 millóns de euros, exporta a 60 mercados, entre eles, Romanía, Paquistán, Bangladesh, Nepal, Libia ou Corea do Sur”.
E na súa intervención tamén sinalaba que ata o vindeiro 7 de marzo estará aberto o prazo da nova convocatoria de axudas para a transformación e comercialización que, cunha achega de 30 millóns de euros -un 15% máis que a anterior edición-, facilitará, entre outras cousas, garantías (avais) para préstamos destinados a proxectos, así como expandir iniciativas.
Logo de recordar que este programa ten contribuído notablemente á competitividade do sector primario, con preto de 400 proxectos beneficiarios no período 2016-2020 e 100 millóns de euros investidos, o titular da Xunta salientou tamén que ata o 9 de marzo permanecerá aberto o período de solicitude das axudas para a incorporación de mozos ao agro, para plans de mellora e pequenas explotacións.
“Estamos a falar de máis de 37 millóns de euros destinados a favorecer a remuda xeracional no sector primario, para estimular a actividade e para favorecer a modernización do noso tecido produtivo no rural”, abundou, resaltando que, desde 2009, foron máis de 4.000 os mozos que se sumaron ao sector primario.
Ademais destas axudas, Feijóo afirmou que o Executivo galego seguirá apoiando a competitividade do rural a través doutras iniciativas como a Lei de recuperación da terra agraria de Galicia que conta con figuras como: os polígonos agroforestais, para mobilizar grandes superficies, como os dez nos que se está a traballar; as aldeas modelo; ou as agrupacións forestais de xestión conxunta.
