Wilson Jones Rodríguez nacía un 19 de maio de 1934 na daquela rúa José Antonio do Barco. Este valdeorrés, de ascendia inglesa, daba os primeiros pasos da súa meritoria e desacada carreira futbolística na súa vila. “Con 13 ou 14 anos xa adestraba co primeiro equipo do Barco, chegando a xogar en Madrid no ano 50 fronte ó Obras del Puerto de Alicante a final do Campionato de España de Educación e Descanso, acadando o ascenso á primeira categoría desta competición. Tamén practicaba o baloncesto co Barco; lembro aqueles encontros de gran rivalidade co Trebol de Ponferrada”. Así o contaba o propio Jones nunha reportaxe publicada anos atrás en O SIL Deportivo.
No ano 1951 trasladábase a Oviedo para estudiar Dereito, e aí onde proba co equipo desta cidade, por aquel entón en 2ª división. Tendo xa 18 anos, ficha polo Lemos en 3ª división, e será precisamente dende o conxunto lucense dende onde vai da-lo gran salto ó Real Madrid, co que asinaría o seu primeiro contrato profesional. Na temporada 53-54, Wilson irá cedido ó Lérida, en 2ª división, co que disputou a liguiña de ascenso. Ó remate da temporada volta ó Real Madrid e inicia a 54-55 de novo cedido, nesta ocasión, no Alavés en 1ª división. Despois, voltaría ao Real Madrid, co que se proclamaría campión de Europa na 1955-56. Ademais nas temporadas 1956-57 e 197-58 chegou a ser convocado coa Selección Española B nun España-Italia.
Wilson Jones, que residía en Ourense, mantivo sempre un estreito vínculo coa súa vila natal, onde era unha persoa querida. Este destacado ex futbolista falecía o domingo 11 de xullo aos 87 anos de idade.
Comunicado oficial do Real Madrid
Dende o Real Madrid emitíase un comunicado lamentando a morte do seu ex xogador. “O Real Madrid C. F., o seu presidente e a súa Xunta Directiva lamentan profundamente o falecemento de Wilson Jones, que vestiu a camiseta do noso club entre os anos 1955 e 1956, nos que gañou 1 Copa de Europa. O Real Madrid quere expresar as súas condolencias e o seu agarimo e afecto a todos os seus familiares e seres queridos e a todos os clubs nos que xogou durante toda a súa carreira. Wilson Jones faleceu aos 87 anos de idade. O Real Madrid fai extensivas as súas condolencias a todo o madridismo”.
