Unha das novidades máis destacadas da 54ª Feira do Viño do Ribeiro, que se celebrará do 29 de abril ao 1 de maio na Alameda de Ribadavia, será a súa elevada participación con ata 42 stands de adegas e colleiteiros. “É a maior rexistrada nos 54 anos de existencia do evento”, tal e como se destacaba no acto de presentación desta mostra, na mañá do 18 de abril na Coruña.
No decurso deste acto tamén se daban a coñecer as actividades enogastronómicas incluídas no programa, así como as catas e showcookings, a cargo de cociñeiros e sumilleres de recoñecido prestixio, ou a cata popular (onde se poderán catar a cegas todos os viños presentes na feira). Tamén haberá no recinto feiral unha zona de gastronomía con varias Food Trucks e unha pulpeira, acompañadas polas actuacións musicais.
Outros focos de atracción serán a actividade “Ribeirolandia”, que funcionou con éxito na edición anterior e que deixou moi satisfeitos aos máis pequenos; as actividades de maxia, ou a oferta de traslado en autobús dende Ourense, Vigo e Santiago de Compostela.
Na presentación da feira interviñan Valentín González Formoso, presidente da Deputación da Coruña; José Ignacio Gómez Pérez, alcalde de Ribadavia; Cristina Alcalá, xerente do Consello Regulador da Denominación de Orixe Ribeiro; María López Touza, concelleira de Cultura e Turismo de Ribadavia; e Daniel López, cociñeiro do Restaurante O Camiño do Inglés (Ferrol), participante nas actividades enogastronómicas da 54ª FVR.
O programa da feira pode consultarse en www.feiravinoribeiro.com